Ален Хэкард з амэрыканскага Портлэнду скіраваў у суд пазоў супраць ці не найвядомейшага ў сьвеце баскетбаліста Майкла Джордана а таксама заснавальніка фірмы Nike Філа Найта.

Пазыўнік лічыць, што падабенства да колішняе зоркі NBA сапсавала ягонае жыцьцё. Паводле Хэкарда, вось ужо паўтара дзесяцігодзьдзі яго блытаюць з Джорданам, да якога ён ня мае жаднага дачыненьня.

Больш за тое, Джордан аж на 15 см вышэйшы за свайго “клёна”. Аднак гэты факт ня мае істотнага значэньня. Галоўнае, што Хэкард мае аднолькавую з Джорданам фрызуру (дакладней, у абоіх яна адсутнічае), носіць у левым вуху завушніцу і сама галоўнае – гуляе ў баскетбол. Праўда, у адрозьненьні ад Джордана, толькі на ўзроўні аматараў.

Маральны ўрон ад свайго падабенства Хэкард ацаніў у 832 млн даляраў, прычым палову гэтае сумы яму мае выплаціць Майкл Джордан, а яшчэ палову – Nike.