Выкрываць злачынцаў у Еўрапейскім Звязе зараз будзе больш зручна: на гэтым тыдні пасля шматлікіх перамоваў міністры юстыцыі краінаў ЕЗ дамовіліся аб зацверджанні агульнаеўрапейскага ордэру на абмен інфармацыяй, доказамі, у тым ліку рэчыўнымі.

Асноўнай мэтай агульнаеўрапейскага ордэру ёсць дапамога непасрэдным удзельнікам следства, у першую чаргу, забеспячэне іх звесткамі аб асобах, якія знаходзяцца пад падазрэннем. Ордэр дазваляе судовым уладам адной краіны ЕЗ свабодна запытваць доказы ў іншай краіне Звязу і выкарыстоўваць іх падчас судовага працэсу. Аднак, без спецыяльнага дазволу замежныя судовыя ўлады не маюць права праводзіць допыты, здымаць адбіткі пальцаў і ажыццяўляць ДНК-экспертызы.

У спісе злачынстваў, расследванне якіх будзе зараз праводзіцца ў адпаведнасці з новым агульнаеўрапейскім ордэрам, пазначаны тэрарызм і наркагандаль. Апошняе асабліва непакоіць Нідэрланды. Улады гэтай краіны мяркуюць, што могуць апынуцца заваленымі запытамі іншых краінаў на прадастаўленне доказаў, улічваючы адносную мяккасць галандскіх законаў аб захаванні і ўжыванні наркотыкаў.