Рэдакцыйная палітыка:
Рэдактарская рада часопісу будзе радая апублікаваць на сайце “Праўніка” беларускамоўныя альбо ангельскамоўныя (для ангельскай вэрсіі сайта) тэксты маладых адмыслоўцаў з права й паліталёгіі. Адна з галоўных мэтаў нашага праекту — рэпрэзэнтоўваць трыбуну для беларускамоўнае юрыдычнае і паліталягічнае аналітыкі, не абцяжаранае абэрацыямі каляніяльнага мысьленьня. “Праўнік” не абмяжоўвае кола аўтараў адно студэнтамі права й паліталёгіі, у ім маюць магчымасьць апублікаваць свае тэксты ўсе тыя, хто імкнецца “мысьліць-па-беларуску-й-дзеля-Беларусі”: ад выпускнікоў юрфакаў да дактароў юрыдычных навук, ад тэарэтыкаў сталічных ВНУ да практыкуючых праўнікаў беларускіх мястэчак. Тое ж датычыцца адукацыйных падмуркаў (сацыяльная філязофія, гісторыя і г.д.). Часопіс — праект валянтэрскі, таму рэдакцыя ня мае магчымасьці выплочваць сваім аўтарам ганарар.
Пры падборы тэкстаў мы імкнемся пакідаць як мага больш вольнага прастору для выказваньня шырокага спэктру пазыцыяў, у тым ліку нетрадыцыйных. Мы лічым непрымальнай дыскрымінацыю паводле перакананьняў, узросту, нацыянальнасьці, сацыяльнага й акадэмічнага статусу аўтараў. Аднак мы пакідаем за сабою права публікаваць альбо не публікаваць дасланыя нам тэксты, а таксама не падзяляць пазыцыю аўтараў ды выказваць свае меркаваньні ў камэнтарох-паслоўях. Рэдакцыя не нясе адказнасьці за зьмест матэрыялаў, зьмешчаных на сайце часопісу.
Патрабаваньні да матэрыялаў:
Тэксты прымаюцца ва ўсіх трох варыянтах сучаснай беларускай мовы: клясычны правапіс, “наркамаўка”, лацінка. Пераклад расейскамоўных тэкстаў на беларускую мову магчымы адно ў выпадку, калі яны падаюцца рэдактарскай радзе надзвычай арыгінальнымі. Таксама могуць быць разгледжаны тэксты на ўкраінскай і польскай мовах.
Дасылайце свае тэксты, навуковыя дасьледаваньні, рэцэнзіі у электронным выглядзе на адрас praunik@praunik.org у фармаце Microsoft Word ці RTF. У дадатак да тэксту самога артыкула, калі ласка, не забудзьцеся даслаць колькі сказаў пра сябе: імя й прозьвішча аўтара, месца навучаньня ці працы, сьпіс апошніх публікацыяў, навуковыя ці практычныя інтарэсы. Перад тым, як адправіць свой тэкст нам, спраўдзьце яго на наяўнасьць недакладнасьцяў і памылак, бо з прычыны загружанасьці рэдакцыі часопісу працэс карэктуры тэкста можа зацягнуць ягоную публікацыю.
Разгляд матэрыялаў:
На працягу аднаго тыдня пасьля таго, як тэкст быў дасланы, мы зьвязваемся з аўтарам і паведамляем пра нашае рашэньне наконт ягонай публікацыі.
Мы зь вялікай ахвотай пашыраем кола нашых аўтараў! Чакаем на Вашыя тэксты!
