24 верасьня Прэзыдыўм Вярхоўнага Савету БССР выдаў Указ “Аб дзяржаўным гімне Беларускай ССР”, які зацьвердзіў тэкст гімна (верш М. Клімковіча) і ягоную мэлёдыю (музыка Н. Сакалоўскага). Пасьля распаду Савецкага Зьвязу ў якасьці гімна выкарыстоўвалася толькі ягоная музыка, але пасьля правядзеньня нацыянальнага конкурсу на стварэньне новага гімна, 2 ліпеня 2002 г. Прэзыдэнт Беларусі Аляксандр Лукашэнка ўказам №350 зацьвердзіў у якасьці Дзяржаўнага гімна твор са старой музыкай і часткова зьмененым тэкстам. Адначасова на статус дзяржаўнага гімна прэтэндавалі такія творы, як верш “Пагоня” М. Багдановіча, “Магутны Божа” на словы Натальлі Арсеневай, “Мы выйдзем шчыльнымі радамі…”, але, так як і ў сытуацыі зь іншымі нацыянальнымі сымбалямі – сьцягам ды гербам, – беларускі гімн застаецца ўзорам “заўсёднай прыхільнасьці беларускага народу” савецкай спадчыне. Ніжэй падамо вышэйзгаданыя вершы:

Мы выйдзем шчыльнымі радамі

На вольны родны наш прастор.

Хай воля вечна будзе з намі,

А гвалту мы дамо адпор!

Хай аджыве закамянелы

Наш беларускі вольны дух;

Штандар наш бел-чырвона-белы,

Пакрыў сабой народны рух!

На бой! За шчасьце і за волю

Народу слаўнага свайго!

Браты, цярпелі мы даволі.

На бой! — усе да аднаго!

Імя і сілу беларуса

Няхай пачуе й бачыць той,

Хто сьмее нам нясьці прымусы

I першы выкліча на бой.

Браты, да шчасьця мы падходзім:

Хай гром грыміць яшчэ мацней!

У крывавых муках мы народзім

Жыцьцё Рэспублікі сваёй!

(Музыка Уладзімера Тэраўскага. Словы Макара Краўцова, Нацыянальны гімн Беларускай Народнай Рэспублікі).

Магутны Божа! Уладар сусьветаў,

Вялікіх сонцаў і сэрц малых,

Над Беларусяй, ціхай і ветлай

Рассып праменьні свае хвалы.

Дай спор у працы, штодзённай, шэрай.

На лусту хлеба, на родны край.

Павагу сілу і веліч веры

У нашу праўду, у прышласьць дай.

Дай урадлівасьць жытнёвым нівам,

Учынкам нашым пайшлі ўмалот.

Зрабі свабоднай, зрабі шчасьлівай

Краіну нашу і наш народ.

(Словы Натальлі Арсеневай, музыка Мікалая Равенскага)

ПАГОНЯ

Толькі ў сэрцы трывожным пачую
За Краіну радзімую жах,
Ўспомню Вострую Браму святую
І ваякаў на грозных канях.

Ў белай пене праносяцца коні,
Рвуцца, мкнуцца і цяжка хрыпяць:
Старадаўняй Літоўскай Пагоні
Не разбіць, не спыніць, не стрымаць.

У бязмерную даль вы ляціце,
А за вамі, прад вамі - гады.
Вы за кім у пагоню спяшыце?
Дзе шляхі вашы йдуць і куды?

Мо яны, Беларусь, панясліся
За Тваімі дзяцьмі уздагон,
Што забылі Цябе, адракліся,
Прадалі і аддалі ў палон?

Бійце ў сэрцы іх, - бійце мячамі,
Не давайце чужынцамі быць!
Хай пачуюць, як сэрца начамі
Аб радзімай старонцы баліць...

Маці родная, Маці-Краіна,
Не усцішыцца гэтакі боль!..
Ты прабач, Ты прымі свайго сына,
За Цябе яму ўмерці дазволь.

Ўсё лятуць і лятуць тыя коні,
Срэбнай збруяй далёка грымяць...
Старадаўняй Літоўскай Пагоні
Не разбіць, не спыніць, не стрымаць.

(Словы М. Багдановіча, музыка М. Равенскага).

Урывак з сучаснага Дзяржаўнага гімна:

Мы, беларусы — мірныя людзі,

Сэрцам адданыя роднай зямлі,

Шчыра сябруем, сілы гартуем

Мы ў працавітай, вольнай сям'і.

Слаўся, зямлі нашай сьветлае імя,

Слаўся, народаў братэрскі саюз!

Наша любімая маці-Радзіма,

Вечна жыві і квітней, Беларусь!

Параўн. з старым гімнам:

Мы, беларусы, з братняю Русьсю

Разам шукалі к шчасьцю дарог.

У бітвах за волю, у бітвах за долю

Зь ёй здабылi мы сьцяг перамог!

Нас аб'яднала Леніна імя,

Партыя к шчасьцю вядзе нас у паход.

Партыі слава! Слава Радзіме!

Слава табе беларускі народ!

Можа недарма гімн афіцыйна завецца Дзяржаўным, а не Нацыянальным?